O dia 4 de julho, dentro de umha semana, começa em Santiago de Compostela o festival éMundial, ato central do 30º aniversário da Associaçom Galega da Língua (AGAL).
Durante toda a semana, e até 9 de julho, a capital do País será um ponto de encontro de pessoas de diferentes pontos da Lusofonia através de atividades do mais variado.
Enquanto durar o evento estarám abertas duas exposiçons. Umha, da portuguesa Maria Rodrigues, visitável na Casa das Crechas. Outra, já disponível desde há uns dias, na biblioteca Ánxel Casal, que consiste numha série de fotografias do brasileiro Sebastião Salgado sobre o Movimento dos Sem Terra.
Além disto há atividades específicas para cada dia. A dia 4, às 20:30h, estará o escritor Paulo Soriano no Café Bar As Duas para apresentar dous dos seus livros, Contos Galegos e Histórias Nefastas. Já às onze da noite, na Borriquita de Belém, o guitarrista brasileiro Sérgio Tannus será o mestre de cerimónias de umha sessom JAM Brasil.
Para o dia 5, a organizaçom do evento propom um obradoiro de leitura em português focado para crianças, que será lecionado de 11 a 12:30 na biblioteca Ánxel Casal. Já às 20:30, no Café Bar As Duas haverá umha mesa redonda conduzida por Xurxo Troncoso com pessoas de vários países lusófonos que residem na Galiza.
Quarta-feira, 6 de julho, o Centro Social A Gentalha do Pichel acolhe o lançamento da Breve Antologia Poética de Guerra da Cal, ediçom a cargo de Carlos Durão que forma parte dos atos de comemoraçom do centenário do nascimento do escritor. No mesmo ato também será apresentado um sítio web dedicado à figura do ilustre ferrolano. E no mesmo dia, mas às 23h, na Casa das Crechas será estreado o vídeo-clipe do disco Acrobata, de Ugia Pedreira e Fred Martins. A seguir também se projetará o concerto de bolso Depressa a Vida Passa, de Xurxo Ponce e Sabela Vázquez, bem como fragmentos do documentário A Música Portuguesa a Gostar dela Própria, de Tiago Pereira.
A dia 7, às 20h, o Café Bar As Duas será o cenário de umha mesa redonda sobre a mobilizaçom juvenil em Angola, coordenada pola jovem cantora angolana Aline Frazão, membro do grupo A Minha Embala. Hora e meia depois, na Casa das Crechas, haverá outra mesa redonda, mas para apresentar diferentes festivais com vocaçom lusófona: trata-se do Festival Andanças (Portugal), de Cantos na Maré e do Festival de Poesia do Condado. Respetivamente intervirám Diana Mira, Uxía e Manolo Soto.
Sexta-feira, dia 8, As Duas acolherá às 20:30 a mesa redonda «Empresas e a oportunidade da língua», apresentada por Ângelo Lodeiro, de Projeto U-lo, com quem intervirám repreentantes das emrpesas imaxin|software, Sacauntos e GlobalNovaTrade.
Romaria
O prato forte do festival será no sábado, dia 9, com umha intensa romaria
no parque de Sam Domingos de Bonaval que concentrará as mais variadas
atividades. Todo o dia haverá umha zona de coletivos que incluirá balcom
e mesa com livros e música.
Além disto, de 11:30 a 13:30 haverá umha passeata do grupo Trópico de Grelos. De 14 a 17 haverá um jantar com produtos típicos lusófonos e a seguir, até as 18h, atividades a cargo da Associaçom de Pais e Mães ‘Agarimar’.
De 18 a 19 horas, Paula Carballeira dirigirá umha sessom de conta-contos, e umha hora depois Mercedes Prieto responsabilizará-se por um obradoiro de dança. A romaria finaliza com umha roda de capoeira de 20 a 21 horas com o Grupo de Capoeira ‘Angola Zimba’ (Brasil).
Mas o programa nom finaliza aí, pois deixa atividades para a noite, já na Sala Nasa, na Rua da Carvalheira de Sam Lourenço. Desde as 22:30 e até perto da umha da madrugada atuam Kana Kaiana —brasileiros estabelecidos em Compostela— e Malandrómeda.
Umha língua mundial
Com esta intensa semana de atividades, com presença de pessoas de tantos
pontos da Lusofonia, a AGAL pretende demonstrar que a nossa língua é «mundial», pois a língua comum será o eixo central de todos os atos. «Polo éMundial desfilarám pessoas que falam a língua da Galiza com diferentes sabores e musicalidades», assinala o presidente da associaçom, Valentim R. Fagim.
Trinta anos da AGAL
A Associaçom Galega da Língua é umha associaçom sem ánimo lucrativo, legalmente constituída em 1981, que visa a plena normalizaçom do galego-português da Galiza e a sua reintegraçom no ámbito lingüístico a que historicamente pertence: o galego-luso-brasileiro.
+ Para mais informações:
- Página web do evento: http://emundial.agal-gz.org
- Página no Facebook: http://facebook.com/emundial
- Perfil no Twitter: http://twitter.com/e__mundial (@e__mundial)