Miguel R. Penas e José Luis García apresentam o éMundial 2014

apresentaçom éMundial 2014 (v)

À esquerda, o presidente da AGAL, Miguel R. Penas. À direita, o alcaide de Arçua, José Luis García

Nesta quinta-feira, 26 de junho, foi apresentada em Arçua a terceira ediçom do festival éMundial, um evento que chega por primeira vez a esta vila e que terá lugar no primeiro sábado do mês de julho.

Como novidade desta ediçom, o éMundial 2014 decorrerá numha única jornada na que o recindo multiusos de Arçua oferecerá umha alargada oferta musical, gastronómica, de lazer, cultural, infantil,… sempre por volta das potencialidades e oportunidades que nos oferece a nossa língua no quadro da Lusofonia. Os detalhes do evento fôrom explicados polo alcaide de Arçua, José Luis Garcia, e o presidente da AGAL, Miguel R. Penas.

O alargado programa, que pode ser consultado no sítio web www.emundial.org, iniciará no dia 5 de julho às 11h30 com o pregom do multifacetado artista Xurxo Souto. A seguir, sessom vermu com Terra Morena e Rui David. Depois da música, o pessoal poderá escolher entre participar no ateliê de percussom do brasileiro Paulo Silva ou assistir à mesa redonda sobre a Lei Paz-Andrade.

Posteriormente, haverá um jantar africano —única atividade de pagamento de todo o evento—. Já pola tarde, toda a tarde, haverá atividades para miúdas e miúdos no Espaço Semente (música, brinquedos, conta-contos…). Para os mais graúdos, outras propostas, como a terceira Ramagem da rede de clubes de leitura em português Pega no Livro, o lançamento de Quês e porquês do reintegracionismo, umha mesa redonda de cidadãos lusófonos ou a grande novidade deste éMundial: «Somos… e fazemos», umha oportunidade para que entidades galegas com umha visom «extensa e útil» da nossa língua se apresentem ou expliquem os serviços que oferecem.

O encerramento do evento começará às 21h com umha sessom de música ao vivo em que participarám artistas de vários países lusófonos, com os galegos Narf e Xabier Mugardos, o brasileiro João Alberto e o angolano Alberto Mvundi.

Aliás, toda a jornada poderá-se visitar a exposiçom Cantigas de Santa Maria. Arte BDieval, haverá um balcom da Superbock e balcões para coletivos.

eMundial2014_cartaz

Comments are closed